Dette er ei høgst personleg oppslagsbok som ikkje kan settast i nokon genre. Forfattaren har valt ut dei orda som han meiner det er verdt å vita noko meir om, og han forklarar dei på sin eigen måte. Det blir både morosamt og personleg. Hovland kan det å fortelje og det gjer han her med utgangspunkt i alle moglege fenomen og personar. Her er artiklar om t.d. kong Arthur, Beatles, camping og James Dean, om foreldre, Sex Pistols og Finland. Mange av artiklane inneheld ikkje anna enn forfattaren sin refleksjon over eit fenomen, medan andre er meir informative. Den undrande forteljerstemma er naiv og storøygd over alt det merkelege i verda. Dette er mest av alt ei humorbok som ein kan gle seg over. Gyldendal Tiden, 2002.
